|
|||
|
گه‌لانی رۆژهه‌ڵاتی نێوه‌راست له‌سه‌ر دووڕێیانی چاره‌نووس ... كه‌ماڵ گروێسی |
|||
|
14-11-2003 00:14 |
|||
|
به پێی
به‌ڵگه‌مێژووییه سه‌لمێنراوه‌كان ناوچه‌ی رۆژهه‌ڵاتی نێوه‌راست
یه‌كێك له هه‌وه‌ڵین مزڵگه‌كانی گیرسانه‌وه و نیشته‌جێ بوونی مرۆڤ بووه.
یه‌كه‌م جار له‌و مه‌ڵبه‌نده مرۆڤ ئاژه‌ڵی كێوی ده‌سته‌مۆ
كردووه و هه‌ر له‌وێنده‌رێش دانه‌وێڵه‌ی چاندووه. بێگومان له ره‌وتی
زه‌ماندا ئه‌م ناوچه به‌پیت و به‌ره‌كه‌ته
ده‌ستاوده‌ستی زۆر كردووه و زۆر ده‌سه‌ڵاتی جۆراوجۆری به‌خۆیه‌وه دیوه،
كه هێندێكیان جێگیربوون و به‌شێكیشیان توواونه‌وه و تێدا چوون. هه‌رچه‌ند ره‌وته‌كه
هێندێك خاو و له‌سه‌ره‌خۆش بێ به‌ڵام جێگیربوونی
خاترجه‌مه. بۆ وێنه زه‌مانێك دینی زه‌رده‌شتی
دینی باڵاده‌ستی ناوچه‌كه بوو، به‌ڵام دواتر
شوێنی خۆی دا به ئیسلامی عه‌ره‌ب و به‌ره به‌ره دینی زه‌رده‌شتی تۆزی
فه‌رامۆشی لێنیشت، دیاره زه‌بروزه‌نگی ئیسلام و
تێپه‌رینی كاتیش هۆكارێكی گرینگ بوون بۆ كزولاواز بوونی زه‌رده‌شتی،
دیاره له‌گه‌ڵ هه‌موو ئه‌وانه‌ش دینی زه‌رده‌شت ئێستاش له ناوچه‌كه
و جیهانیش دا لایه‌نگرو هۆگری هه‌یه. عه‌ره‌به‌كانیش دوای ئه‌وه‌ی محه‌مه‌دی كوری عه‌بدوڵای قوره‌یشی ئیسلامی بۆ هێنان، دوای ماوه‌یه‌ك لاساری و رانه‌هاتن، سه‌ره‌نجام ملیان وه‌به‌ر نیری ئیسلام داو و كاتێك دیتیان به‌و ئامرازه نوێیه ده‌سكه‌وتی باشتریان ده‌بێ، ملیان له بڵاو كردنه‌وه‌ی ئیسلامی عه‌ره‌بی نا و وه‌ك زه‌رده‌واڵه‌ی هاروژاو به مه‌ڵبه‌نده‌كه‌دا بڵاو بوونه‌وه و هه‌موو ناوچه‌كه‌یان داگیر كرد و ئیسلامی خالیسی محه‌مه‌دی یان به زه‌بری شمشێر به سه‌ر گه‌لانی ناوچه‌كه‌دا سه‌پاند. دیاره كورد به هۆی هه‌ڵكه‌وتی مه‌ڵبه‌نده‌كه‌ی له‌زنجیره چیای زاگرۆس و خۆڕاگری گه‌له‌كه‌ی دره‌نگتر له گه‌لانی دیكه‌ی ناوچه‌كه ئیسلامی به‌سه‌ردا سه‌پا. ئه‌وانه‌ی كوردستانیان دیوه بێشك له‌سه‌ر گرد و ته‌پۆلكه و شاخه‌كانی، چاویان به شوێنی وا كه‌وتووه كه پێیان ده‌ڵێن: قیسن، چاك و مه‌رقه‌د. كه‌متر گرد، چیا، شاخ و ته‌پۆڵكه هه‌یه یه‌ك دوو چاك و پیری لێ نه‌بێ، ئه‌وانه‌ش كاتێك مێژووه‌كه‌یان ده‌خوێنیه‌وه بۆت ده‌ر ده‌كه‌وێ كه ئه‌م ئیمامزاده و پیاوچاكانه هه‌ر ئه‌و عه‌ره‌به پیاو كوژانه بوون كه سه‌رده‌مانێك بۆ به‌رژه‌وه‌ندی عه‌ره‌ب و بڵاو كردنه‌وه‌ی بیروباوه‌ڕی محه‌مه‌دی كوری عه‌به عه‌ره‌ب هاتوونه ناوچه‌كه و به ده‌ست نیشتمانپه‌روه‌رانی كورد سه‌كه‌ت كراون. دیاره عه‌ره‌ب مافی خۆی بووه و هه‌یه كه شانازی به ئیسلامه‌وه بكا چونكه ئه‌و عه‌ره‌به‌ی له لمی بیابان و دڕوی وشتر خۆره و وشتر، چیدی نه‌دیبوو له ناكاو ببووه خاوه‌نی به‌هه‌شتی سه‌ر زه‌وی، ئه‌و به‌هه‌شته‌ی به پێی قسه‌كانی پێغه‌مبه‌ره‌كه‌یان ده‌بوو چه‌رمه‌سه‌ری و كوێره‌وه‌ری ببینن و جینایه‌تی بێ ژومار بكه‌ن و بۆی بكوژرێن تا له دنیای دیكه بیگه‌نێ. ئه‌و عه‌ره‌به‌ی بۆ قومێك ئاو ده‌بو رۆژه رێیه‌ك بڕوا، هاتبووه شوێنێك كه هه‌ر دۆڵ و شیو و به‌رقه‌ده‌ی ده‌یان كانیاوی زوڵاڵ و ئاوی سارد و سازگاری لێ بوو كه زمزم له حاندیان گنخاو بوو. ئیسلام له‌م ناوچه‌دا زیاتر له هه‌زاروچوارسه‌ت ساڵه ریشه‌ی داكوتاوه و هه‌ڵقه‌ندنی ره‌نگه كارێكی گران و درێژخایه‌ن بێ، به‌ڵام هه‌ر ده‌بێ بكرێ. ئه‌م گۆڕانكارییه‌ش وه‌ك هه‌موو گۆڕانكاریه‌كانی پێشوو پێویستی به كات هه‌یه. دیاره به هۆی پێشكه‌وتنی عیلم و زانسته‌وه، پڕوپووچ و دواكه‌وتوویی زووتر جێگای خۆی ده‌دا به دێموكراسی و مافی گه‌لان. به‌ره‌ی نوێ خه‌ڵكی تێگه‌یشتوو و لێزانی زۆره و زۆرن ئه‌وانه‌ی هاتوونه سه‌ر ئه‌و باوه‌ڕه‌ی كه كلاسه‌كانی ده‌رسی سه‌رده‌م، به مه‌كته‌به قورعانه‌كانی تاڵه‌بان و وه‌هابیسم و شێعه‌گه‌ری ناگۆرنه‌وه و پێیان وایه ئیسلام له گونجاوترین شێوه‌دا ده‌توانێ بخزێته‌وه قوژبنی مزگه‌وته‌كان و دم له سیاسه‌ت و ئه‌و مه‌سه‌لانه نه‌دا كه رێگا چاره‌ی بۆیان نییه و تێیاندا ده‌سته‌وه‌ستان ماوه. چیدی ناكرێ خه‌ڵك به دوو به‌ره‌ی كافر و موسوڵمان دابه‌ش كرێ و به‌و پێیه‌ش هه‌ڵسووكه‌وتیان له‌گه‌ڵ بكرێ. چیدی ناكرێ بۆ دابین
كردن بژێوی ژیان و ژینێكی ئینسانی كه ده‌كرێ هه‌ر له‌سه‌ر ئه‌م دنیایه
وه‌گیركه‌وێ، وه‌عده‌ی به‌هه‌شتی دوای مردن بده‌ن
به خه‌ڵك. ئه‌وه‌ی ئه‌وان له‌م دنیایه ده‌یده‌ن
به خه‌ڵك هه‌ر جه‌هه‌نه‌مه‌كه‌یانه كه چیدی خه‌ڵك تاقه‌تیان نه‌ماوه و
هه‌ر رۆژێكیان به ده‌ست تاقمه ئیسلامیه‌كانه‌وه جه‌هه‌نده‌مه.
سروه‌ی ئازادی و دێموكراسی له رۆژهه‌ڵاتی ناوه‌راست هه‌ڵیكردووه و
به‌ربه‌ره‌كانی له نێوان راستی و پڕوپووچ دا له ئێران،
عێراق، توركیه،
ئه‌فغانستان، سوریه وعه‌ره‌بستان،
به كورتی هه‌موو رۆژهه‌ڵاتی نێوه‌ڕاست به
توندی ده‌ستی پێكردووه. له رۆژهه‌ڵاتی
نێوه‌ڕاست باهۆزی زانست و دێموكراسی هه‌ڵیكردووه
و پوش و په‌ڵاش و قانگه‌لاشكه‌كانی پڕوپووچ و
نه‌زانی له شیو و دۆڵ و په‌سیوان په‌ستاوتووه.
خۆری رزگاری ده‌دره‌وشێته‌وه و شه‌مشه‌مه‌كوێره‌كانی ناوچه‌ی
خزاندۆته كه‌لێن و قوژبن وتاریكی. .12-11-03
|
